ट्रकच्या धडकेत दुचाकीस्वाराचा मृत्यू

मुर्तीजापुर :प्रतिनिधी:-मुर्तीजापुर तहसील अंतर्गत येणाऱ्या कुरुम बस स्थानकावर रस्ता ओलांडणाऱ्या दुचाकीला ट्रकने जबर धडक दिल्याने झालेल्या अपघातात वृद्ध दुचाकीस्वार गंभीर जखमी झाल्याची घटना राष्ट्रीय महामार्ग क्र.६ वरील कुरुम बस स्थानकावर आज सोमवारला सकाळी ११:१५ वाजताच्या दरम्यान घडली. यात गंभीर जखमी अवस्थेत असलेल्या वृद्ध  दुचाकीस्वाराचा अमरावती येथे उपचारादरम्यान मृत्यू झाला.

  प्राप्त माहितीवरून कुरुम रेल्वे स्टेशन येथील रहिवासी बिहारीलाल दशरथ गुजर अंदाजे वय ६२ वर्ष हे कुरुम येथून बँकेचे काम आटोपून दुचाकी क्र.एम एच २७ एस २२४४ या वाहनाने महामार्ग ओलांडुन घरी परत जात असता अकोल्याकडून अमरावतीकडे जाणारा ट्रक क्र.सि जि ०४ जे सि ४५५९ या वाहनाने भरधाव वेगाने येऊन दुचाकीला धडक दिली.यात वृध्द दुचाकीस्वार दुचाकीसह खाली कोसळल्याने त्याच्या डोक्याला व पायाला गंभीर इजा होऊन रक्तस्राव झाला.

यावेळी गावकऱ्यांनी व नातेवाईकांनी घटनास्थळी धाव घेऊन गंभीर जखमी व बेशुद्ध अवस्थेत असलेल्या बिहारीलाल गुजर यांना येथील सामाजिक कार्यकर्ते मनीष महाजन यांच्या खाजगी वाहनाने उपचाराकरिता अमरावती येथील इर्विन रुग्णालयात हलविले.यादरम्यान त्यांना रस्त्यातच रक्ताची उलटी झाली.यावेळी रुग्णालय गाठून उपचार सुरू होण्यापूर्वीच बिहारीलाल यांची प्राणजोत मालविली.

     वृत्त लिहिस्तोवर पो.स्टे.माना येथे गुन्हा दाखल झाला नव्हता.

     बिहारीलाल गुजर यांच्या मागे पत्नी,दोन मुलं,तीन मुली असा परिवार आहे.त्यांच्या मृत्यूमुळे गावात हळहळ व्यक्त करण्यात येत आहे.